Aðaláhersla verður lögð á eftirfarandi í íslensku og stærðfræði:

Íslenska

• Lestur
• Lesskilningur
• Ritun (inngangur, meginmál, lokaorð. Þ.e. kjötmikli hamborgarinn)
• Stafsetning 
• Upplestur
• Kynnast sagnorðum og lýsingarorðum
• Fallbeyging nafnorða
• Nútíð / þátíð

Ég hef veitt því athygli að sumir nemendanna hafa ekki lesið heima í yfir mánuð. Endilega látið nem. lesa heima.

Stærðfræði

• Stórar tölur
• Peningar
• Neikvæðar tölur
• Mínus: að fá lánað
• Samlagning: að geyma
• Margföldun
• Klukkan
• Deiling
• Námundun að tug og hundraði
• Mynstur
• Mælingar
• Hnit
• Tölfræði: að telja, flokka, skrá og lesa úr niðurstöðum

Sumir nemendur eru farnir að vera svolítið kærulausir með skil á heimanámi. Þetta hefur gengið mjög vel fram að þessu. Nú skulum við taka þessa síðustu önn vetrarins alvarlega og sinna vel bæði heimanámi og heimalestri.

Sumir nemendanna vantar strokleður og límstifti. Spyrjið endilega börnin ykkar og kaupið handa þeim strokleður, límstifti og kannski blýant. Það er alltaf gaman að fá nýtt, sérstaklega þegar það er komin smá þreyta í mannskapinn.

Baráttukveðja, Anna Þórný

Í dag, þriðjudag, gerðist það því miður að svokallað snjóstríð virðist hafa gengið langt yfir strikið. Í snjóstríðinu var 3. bekkur og annar eldri bekkur. Í eldri bekknum voru bæði fleiri og sterkari nemendur og fannst 3. bekk eins og það hafi þvílíkt verið vaðið yfir þá. Nemendur komu ansi heitt í hamsi inn úr frímínútum, annaðhvort grátandi eða mjög reiðir. Þetta var rætt fram og tilbaka. Það vildi þannig til að seinna um daginn eru þessir 2 bekkir saman í tíma og urðu því allir í raun að sættast, hafa því flestir róast og tekist í hendur. Börnin gætu þurft að tjá sig eitthvað um þetta þegar þau koma heim úr skóla í dag.

Ég er nú þegar búin að láta skólastjóra vita af atvikinu. Eins og við vitum þá eiga þeir sem eru í útigæslu að passa að svona gerist ekki, en ég veit að þetta gerðist mjög hratt.

Nú er 3. og síðasta önnin að hefjast. Í dag, föstudag, fóru nemendur heim með námsmat sem skila á í skólann aftur í næstu viku. Fljótlega verður svo getið hér á síðunni á hvað verður lögð mest áhersla í íslensku og stærðfræði.

Það er sko þvílíkur gangur í lestrarátakinu og höfum við ákveðið sameiginlega að hætta ekki fyrr en við höfum lesið 10.000 bls. samtals. Þau eru nú þegar komin í 1.133 bls.

Þau eru með þvílíkt úthald og er hver nemandi að lesa frá 24 bls. upp í 85. Þetta er sko glæsilegur árangur. Það er bara spurning hvernig við eigum að fagna þegar takmarkinu verður náð. Eruð þið með hugmyndir?

Nú er að hefjast lestrarátak í 3. bekk. Það mun fara þannig fram að hver dagur mun hefjast á lestrarstund, þ.e. að nemendur lesi í hljóði í a.m.k. 10 mín, fer eftir einbeitingu og dagsformi. Stefnt verður að því á löngum dögum (þriðju- og miðvikudögum) að ná slíkri stund 2svar sinnum yfir daginn. Þeir nemendur sem styttra eru á veg komnir í lestrinum fá einfaldar bækur til að byrja með til að þeir nái einnig að einbeita sér og líða vel við lesturinn.

Í lok lestrarstundarinnar skráir kennarinn heildar blaðsíðufjölda allra nemenda og lætur hann vera sýnilegan á vegg, bæði heildarblaðsíðufjölda dagsins og heildarblaðsíðufjölda frá upphafi átaksins.

 Markmiðið með þessu er að nemendur sýni samstöðu í verki með að safna blaðsíðum saman, auka lestrarhraða, auki orðaforða og að nemendur þekki og læri að lesa stærri og stærri tölur. 

Vona ég að nemendur og foreldrar/forráðamenn verði jákvæðir gagnvart þessu og að við munum sjá góðar framfarir í vor.

                                                                      Kveðja, Anna Þórný

Þriðjudaginn 2. febrúar  fá nemendur skólans heimsókn frá Djasskvartett Reykjavíkur. Tilgangurinn með heimsókninni verður að kynna fyrir nemendum tónlist undir yfirskriftinni „Tónlist fyrir alla“. Nú er komið að djasskynningu með sannkölluðu landsliði hljóðfæraleikara, skipað þeim Sigurði Flosasyni (saxófónn), Gunnlaugi Briem trommur), Eyþóri Gunnarssyni (píanó) og Tómasi R. Einarssyni (kontrabassi).

Á tónleikunum sem þeir nefna „Ég hef taktinn“ munu þeir leggja áherslu á að djassinn er skemmtileg, fjölbreytt og aðgengileg tónlist og að færa megi hvaða tónlist sem er í djassbúning. Við getum strax látið okkur hlakka til að upplifa góða skemmtun með þessum frábæru listamönnum.

Sæl öllsömul

Næstkomandi miðvikudag 20. janúar verður Bingó fyrir börnin í 3.bekk og foreldra. Fjörið byrjar klukkan 17.00 til ca.18.30 Börnin mega hafa með sér gos og snakk eða nammi. Vonandi eigum við skemmtilega stund með börnunum okkar.

Bestu kveðjur Jenný og Elín (bekkjartenglar)

Ákveðið hefur verið að halda svokallaðan dótadag á miðvikudaginn, þ.e. 13. janúar. Nemendur hafa mikinn áhuga á því að koma með og sýna hvað þau fengu í jólagjöf.

Sæl, öllsömul og gleðilegt ár.

Þá er seinnihluti skólaársins að byrja. Vona ég að þið hafið haft eins rólegt og notalegt jólaleyfi eins og ég hef haft. Börnin voru mörg hver ansi þreytt í gær en stóðu sig með mikilli prýði í skólanum.

Nú höldum við lærdómnum áfram af jafnmiklum krafti og fyrir áramót. Nemendurnir eru allir mjög jákvæðir gagnvart öllum þeim verkefnum sem lögð eru fyrir þau og vinna þau af mikilli samviskusemi. Námið þyngdist allt í einu allverulega en standa þau sig afar vel.

Ég byrja alla daga á góðri innlögn með upprifjun á öllum þeim atriðum sem við höfum farið í, þ.e. í klukkuna, námundun að næsta tug og hundraði, horn (hvasst, rétt og gleitt horn), nafnorð, kyn nafnorða (kvk, kk og hvk), eintölu og fleirtölu. Svo eru þau einnig að vinna heilmikið í stuttum lesdæmum. Og er það reyndar ástæðan fyrir því að þau eru ekki að lesa mikið fyrir mig í lestrarbókunum. Þau lesa öll mjög mikið fyrir mig í þessum lesdæmum og líka þegar við vinnum með lesskilning sem við gerum einnig mikið af. Í dag byrjuðum við á brotum (1/4, 3/8 o.s.frv.) og ummál og flatarmál er rétt handan við hornið.  Þau standa sig ótrúlega vel í þessu öllu saman.

Á morgun, þrettándanum, ætlum við útí skóg, þ.e. allur skólinn. Þar verða ýmis þrettándalög sungin eins og t.d. Álfareiðin. Ákveðið hefur verið að leyfa öllum sem vilja að koma með vasaljós með sér í skólann. Ég vil endilega biðja ykkur að senda börnin í skólann á morgun í mjög hlýjum fötum, utanyfirbuxum, kuldaskóm og vettlingum því þau koma ekki til með að hlaupa mikið um í skóginum og þeim verður fljótt kalt þegar þau standa lengi kyrr. Ég ætla svo að reyna að vera dugleg að skrifa í Dagskrá vikunnar þannig að þið getið betur fylgst með hvað þau eru að gera í skólanum.

Í samráði við nemendur þá höfum við ákveðið að vera með dótadag næsta miðvikudag, þ.e. 13. janúar. Þau eru mjög spennt fyrir því.

Kveðja, Anna Þórný

Litlu jólin verða haldin föstudaginn 18.desember í Félagsheimilinu. Skemmtunin hefst kl.9:00 og mæta nemendur þangað með skólabílum. Dansað verður kringum jólatré og munu yngsta og miðstig vera með skemmtiatriði í anda jólanna. Að skemmtun lokinni verður snæddur hátíðarmatur í matsal skólans. Heimakstur verður kl. 12:30

Þeir sem eru ekki enn búnir að skila pakka fyrir pakkaleikinn þurfa að muna að taka hann með.

Foreldrum er ekki boðið formlega á skemmtunina en þeim er samt heimilt að koma og horfa á.

Með þessari færslu vil ég nota tækifærið og bjóða ykkur öllum gleðilegra jóla og takk fyrir samskiptin á árinu sem er að líða.

Kveðja, Anna Þórný